Gleði, vinsemd og virðing
 

Þegar börn byrja í leikskóla komast þau í tæri við bakteríu- og veiruflóru sem þau þekktu ekki áður og algengt er að þau sýkist af þeim og sum eru oft veik fyrsta árið. Um tveggja ára aldurinn fara þau að mynda mótefni við þessum sýkingum sem ver þau svo í framtíðinni.

Inn á vef heilsuveru* er stutt samantekt um algengustu smitsjúkdóma barna og viðmið um hvenær sé óhætt að börn þau fari aftur í skólann. Leikskólinn styðst við þessa samantekt eins og hún birtist á vefnum hverju sinni.

Veik börn þurfa ró og næði og eiga rétt á því að dvelja heima þegar þau eru veik. Alla jafna er gert ráð fyrir að börnin geti tekið fullan þátt í skólastarfinu og er því ekki gert ráð fyrir að börn geti verið inni eftir veikindi, þar sem útivist er stór þáttur í skólastarfinu.

Í okkar litla samfélagi hefur skapast gott traust og samstarf milli foreldra og leikskólans meðal annars með því að foreldrar hafa gjarnan upplýst leikskólann mjög vel um þau veikindi og sjúkdóma sem upp koma hjá börnunum eða jafnvel þeim sem aðrir heimilismeðlimir eru með í þeim tilgangi að auðvelda leikskólanum að fylgjast með og bregðast rétt við hverju sinni. Hefur leikskólinn jafnframt lagt sig fram við að upplýsa foreldra um þá smitsjúkdóma sem eru að ganga á leikskólanum. Hversu ítarlega leikskólinn greinir frá er alltaf gert í samráði og með samþykki foreldra. Tilgangur þessa upplýsingaflæðis er einungis til þess að geta auðveldað öðrum foreldrum að fylgjast betur með ef upp koma einkenni hjá þeirra börnum, sérstaklega í ljósi þess að leikskólinn tekur við börnum við eins árs aldur en ekki byrjað að bólusetja börn á þeim aldri við mörgum af þeim veirum og sjúkdómum sem smitast gjarnan á leikskólum. Eins hafa foreldrar verið mjög duglegir að upplýsa leikskólann um bólusetningar barna sinni og er það gert í sama tilgangi, aðeins til að vernda börnin sem best en foreldrar bera vissulega enga skyldu til þess að gera slíkt.